Ամոթույքային նյարդի ցավ 31

Éric Bautrant.
Ամփոփագիր
Ամոթույքային նյարդի ցավի (ԱՆՑ) ախտորոշումը հիմնված է կլինիկական տվյալների, ցավի նեյրոպաթիկ տեսակի և դրա տեղագրության վրա՝ ամոթույքային նյարդի ծայրային ճյուղերի տարածքում: Այն չի պահանջում առանձնահատուկ հարկլինիկական հետազոտություն, և շեքի էլեկտրամկանագրությունն այլևս համակարգված կերպով հարկավոր չէ առաջարկել։ Այնուամենայնիվ, հարկավոր է իրականացնել կոնքի մագնիսա-ռեզոնանսային շերտագրություն՝ ցանկացած ուռուցքային ախտահարում կամ անատոմիական շեղում բացառելու համար։ Ամենահայտնի պատճառը ամոթույքային նյարդի խողովակի սեղմումն է կամ Ալկոկի խողովակի համախտանիշը: Այս համախտանիշը պետք է համապատասխանի Նանտի հինգ չափանիշներին և ներառի հստակ դրական արձագանք տեղային անզգայացնողներին։ Այլ պատճառների շարքում, որոնք կոչվում են «ոչ խողովակային», կարելի է նշել՝ դիստոցիայով բարդացած ծննդաբերության ժամանակ ձգվելու հետևանքով առաջացած ամոթույքային նեյրոպաթիաները, ուղղակի վնասվածքային նեյրոպաթիաները, շաքարային դիաբետով պայմանավորված նյութափոխանակային նեյրոպաթիաները, հերպեսի հարուցած վարակային նեյրոպաթիաները, քիմիաթերապիայի հետևանքով առաջացած դեղորայքային նեյրոպաթիաները, ալկոհոլի թունազդեցության հետևանքով առաջացած նեյրոպաթիաները, հետույքի կամ շեքի մկանների մկանափակեղային համախտանիշների դեպքում հանդիպող նեյրոպաթիաները։ Կարևոր է նաև ամոթույքային նեյրոպաթիկ ցավը, որը հաճախ վատ է համակարգվում և զուգակցվում է այլ կոնքացավերի հետ, տարբերակել կոնքի կենտրոնական գերզգայունացումից։ Ալկոկի խողովակի համախտանիշի առաջացրած ԱՆՑ-ի բուժման ժամանակ օգտակար են Convergences PP-ի խորհրդատվությունները, այդ թվում՝ առաջին շարքի բազմամեթոդ բուժումը: Ձախողման դեպքում և պաշարման թեստին դրական արձագանքից հետո կատարվում է նյարդի ապասեղմման-նեյրոլիզի վիրահատություն՝ հաշվի առնելով դրա նվազ ագրեսիվությունը, ցավի մեղմացման արդյունավետությունը (70-80%) և ապաքինման մակարդակը (50-60%) պատշաճ ընտրված հիվանդների շրջանում։ Ռադիոհաճախականությամբ բուժման և կրիոթերապիայի, ինչպես նաև բոտուլինային թունանյութի ներարկումների վերաբերյալ բավարար ապացույցներ չկան, և դրանք կարող են առաջարկվել միայն որպես երրորդ շարքի բուժում՝ մասնագիտացված կենտրոններում բուժական գործելակարգերի շրջանակներում։ Նեյրոմոդուլացման և տեղային անզգայացնողների շարունակական դիֆուզիա ապահովող պոմպին միացված շուրջնյարդային կաթետերը դիտարկում են վիրահատությունից հետո ձախողման կամ ախտակրկնության դեպքում:
Հունիս 2025
La revue du praticien n° Tome 75 / n° 17 PDF